Shiv se Shakti alag nahi aur Shakti ke bina, Shiv shav hai. ‘I’ ki maatra /shakti hi Shav se Shiv tak le jaati hai. Shakti hi shiv ka adhaar hai, jaise kamzor neev ek acchi imaarat nahi khadi kar sakti, uske liye adhaar majboot hona zaroori hai.. waise hi ke liye zaroori hai shakti. Shiv aatma hain adrishya hai, Shakti drishya (dikhai dene wala) hai. Tabhi to saara sansaar inhe ‘Ardhnarishwar’ kehta hai. Shakti araadhna ke bina, shiv nahi praapt hote. Jis Prakaar doodh mein agar paani ko mila diya jaaye to use alag nahi kiya jaa sakta, waise hi Shivshakti ek doosre se prithak (alag) nahi hai.
Dekha jaaye to Daksh Prajapati ki kanya Sati se sabhi parichit hain, ki unka vivah Shivji se Daksh ne apni poorna sahmati se nahi kiya. Isliye wo (Daksh) Shivji ka samman bhi nahi karte the. Isi kaaran apne yagya ke aayojan mein unhone Shiv-Sati ko nimantran bhi nahi diya, par Sati apne pita ke ghar bagair nimantran ke jaana chaahti theen ( jaise ki ek samaanya parivaar ki ladki karti hai) Parantu Trikaaldarshi Shiv bhavishya mein hone waali ghatna se parichit the. Unhone Sati ko yag mein jaane se rokna chaaha, Par Sati ji Shiv Aagya ke viruddha Daksh Bhavan Chal di, hua kya? Yagya mein apne pati ke liye, apmaanjanak vachan Sati seh na sakin aur yagyavedi mein apne deh ki aahuti de di. Sati Viyog Shivji seh nahi paaye aur unhone Dakshprajapti ke bhavan ko tahas-nahas kar daala, aur phir Sati ke shareer ko kandhe par rakhkar, krodhagni mein poore brahmaand mein ghoomne lage. Vishnu ji ne apne chakra se Sati ke kai bhaag kar diye, jo shareer ka hissa jahaan gira wahaan ek ‘Shaktipeeth’ ban gaya. Inhi Sati ne dubaara iss prithvi pe janma liya, tab ve Himalyraj aur Maina ki putri ke roop mein aayin. Iss janma mein inka naam ‘Parvati’ Rakkha gaya.
Parvati ke roop mein inka prem phir Shiv ko paane ke liye vyakul hone laga aur phir ve Shivprapti ke liye kathor tapasya karne lagin. Tapasya ke phalswaroop aakhir Shiv prasann hue aur Parvati ji ka varan kiya, par Parvati ji ne kaha “Prabhu, ek sadhaaran manushya ki tarah mere maata-pita ko bhi beti ka vivah karne ki ikccha hai, to aap dulhe ki tarah gaane-baaje ke saath baraat lekar mujhe lene aayein.” Ab to Shivji sochne lage ki baraati kaise hote hain? Mere to jo sangi-saathi hain, vahi jaayenge. Aapke (shiv) sangi-sanghi kaun? Rakshas, bhoot, pichaas, dankini, shankini, nandi, bhrangi, ityaadi. Khud shamshaan bhasm se pute hue pahunch gaye, Himaalayraj ke ghar Parvati se vivaah karne. Aisi anokhi baraat dekhkar, Parvatiji ki maa to behosh hokar prithvi pe hi gir padin. Khud hi sochiye, aisi anokhi baraat aur dulhe ko dekhkar koi bhi maa hogi, uska yehi haal hoga.
Parvatiji ne man hi man kaha, “Mahadev, apne iss vikraal swaroop ko iss lok ke anuroop kariye. Aapki sundarta ko dekh sake, aisi drishti yahaan kisi ke paas nahi hai. Aap apna ‘Chandrashekhar’ roop dhaaran karein. Ismein aapki sahaayta Naraayan karenge. Antataah, baraati aur aap swayam, iss lok ke anuroop bane aur phir ‘Parvati pati Mahadev’ kehlaayein. Vivaah ke paschaat Parvati ji Mahadev ke saath Kailaash par aa gayin.
Kailaash par Mahadev saath aa prempoorvak rehne lagin, jis prakaar ek grahasti mein pati-patni rehte hain. Ve Annpoorna ke roop mein sabhi ke liye bhojan banaati, aur patni ke roop mein Shiv par adhikaar bhi rakhti. Maheshwar ko apna guru maankar sishya ban gyaan bhi arjit karti aur kai vishyon ke baare mein charcha bhi karti.
Ek din unhone Shivji se kaha, “Mahadev, bataaiye, prem ka rahasya kya hai? Roop kya hai? Meri jigyasa ko shaant karna. Ye sunkar Shiv ji ne muskuraate hue Shiva se kaha, “Tum pooch rahi ho Parvati! Prem ka rahasya aur roop kya hai? Tumne hi to mujhe prem ki anubhooti karaai. Main to inse anibhigya (kuch na jaan-ne waala tha). Sati roop mein jab tum apne praano ki aahuti dekar mujhse door ho gayi, uss samay mera saara jeevan nirarthak ho gaya. Apne se doopr karke, tumne mujhe mujhse bhi door kar diya. Adhurepan se srishti ka apoorn ho jaana, yahi prem hai. Dubaara Parvati ke roop mein janm lekar mujhe vairagya aur ekaakipan se nikalne par vivash kar dena, yehi prem hai. Annpoorna bankar meri ikchapoorti karna, kamaakhya bankar kaamnapoorti karna, yehi prem hai. Mere alaawa kisi ka bhi varchasw sweekar nahi karna, chausar ke khel mein mujhe parajit karke bhi, mere liye hi vyaakul ho jaati ho. Samudra manthan se nikle halaahal vish ko bhi shaant kar, mujhe sheetalta ka anubhav deti ho. Yehi prem hai. Meri Shakti bankar sanghaar karti ho. Kaali roop mein krodhaangani ki jwaala mein jalte hue, meri chhaati par pair padte hi shaant aur nirmal ho jaati ho, yehi prem ki charam seema hai. Yadi main mahakaal hoon to tum Mahakaali ban jaati ho. Mere dwara diye gaye shraap ko bhi, tum mera aashirvaad bana leti ho. Prithvilok pe mere shraap ke kaaran hi janma lekar, bheelni banti ho. Ab tum hi bataao, bhavaani, ye prem nahi to kya hai.”
Chalo ek doosre se jude aneko prasang ke baare mein hum aage ke ank mein charcha karenge. To phir milte hain agle ank mein ek nayi kahaani ke saath, Shivji ki Shiva kaise apni jigyasaayein Mahadev se milkar shaant karti hain..
– Sandhya Tandon
Leave A Comment
You must be logged in to post a comment.