IHM DIARY 12

Anjaan log, anjaan sheher, maqsad – ek “Degree!” jo unhe is duniya mein “Who are you?” ka jawab dene mein madad karti hai. Unki existence iss duniya mein kya hai uski neev rakhti hai; koi josh se aata hai, toh koi maa baap ki zidd puri karne… kise pata hota hai ki yeh sirf ek degree ki baat nahi, jeevaan ke kai sach seekhne ki baat hai…. Jo kal ghar mein maa ke palu se bandhe hote the woh aaj duniya se ladna seekh rahe hain, jo khoon ke rishton ko nahi samjhte the woh aaj apna ek naya parivaar bana rahe hain…. Sach hai! IHM sabko sab kuch sikha deta hai….

College campus ke bahar main apni gadi ka wait kar rahi thi…
“Areeyyy Mayur aise bhagte hue kaha jaa raha hai?”
“Skype interview hai HR ke sath…college ki light chali gayi hai toh cyber jaa raha hoon…”
Mayur bhaagte hue ek aur batchmate ki bike par baith gaya
“Bike se kyun jaa raha hai rickshaw se chala jaa….”
“Areeyyy bike se jaldi pahunch jaaunga…”
“All the besttt ! Achche se dena”

“Thank you Urvashi!” chillaate hue Mayur bike pe baith kar chala gaya…
Main usse dekhti reh gayi. Mann kiya ki main usse rokk kar kahun ki tum bike pe teen log baithe ho safe nahi hai rickshaw se chale jao…..par main chup rahi Mayur bhi dhul mein kahi ghum ho gaya….

Pata nahi kyun Chibbu aur Bhupi Sir bhaag kar campus se bahar nikle…. Shayad Amul pe jaa rahe honge seniors ne bulaya hoga intro lene ke liye…..
Agle din college mein jab entry hui sabke muh latke hue the….sannaata sa tha….koi wish nahi, kisi ke chehre par koi muskaan nahin…Main locker room mein bag rakhne gayi toh sirf ek hi cheez sunne mili…

“Yaar aisa nahi hona chahiye tha uske sath…”
“College ki kitni badi galti hain iss mein”
“Raat bhar soye nahi hain yaar yeh khabar sun ke”
Main ashcharya mein thi….
“Kya baat sunn ke…”
“Mayur ka accident ho gaya hai…”
“Kya?”
“Kaun Mayur?”
“ Tu nahi jaanti? Mayur Gupta?”
“Woh Mayur jiska kal interview tha???”
“Haan wahi….Infocity jaate hue uska accident ho gaya…”

“Kyaaaa???” mere pairon tale zameen khisak gayi thi…“Yaar!!! Shit!!! Kal hi meri usse pehli baar baat hui thi….infact kal woh mere saamne hi toh interview dene gaya tha….kisi ki bike pe …. Teen log milke …”
“Mayur bahut achcha ladka hai. Uske saath kya kissi aur ke saath bhi aisa nahi hona chahiye ….woh bhi pagal hai usse khud samajh honi chahiye thi….tujhe pata hai! jiske bike pe woh gaya tha, uske khud 8 accidents hogaye hain pichle teen mahine mein ….”
“Shittt!!! Infact I had felt ki main usse rok doon par roka nahi ….”
Kal Gagan ka call aaya tha Chibbu aur Bhuppi sir ke pas….Kya speed mein bhaagte hue gaye the yeh log. Main aur Sakshi walking track pe khade the, humein laga pata nahi, kya hua…raat mein pata chala ki yeh scene ho gaya hai….
“ Shittt!!!!!”

High Quality Content Writers
Dimag mein yahi chal raha tha kaash tab rokk diya hota…Kaash woh meri baat, bina kahe mere kuch kahe, samjh leta…..humari dosti kal hi hui thi sirf 15minute ki baat mein, par aisa laga jaise woh sirf 15minute ki dosti wala dost nahi hai, ek parivaar ka hissa hai….Main bhaag ke Chibbu ke paas gayi….
Chibbu first floor ke parapet pe baith kar soch raha tha…uski aankhein suji hui thi, chehre pe udaasi thi, Chibbu ka yeh side shayad kisi ne nahi dekha hoga…
“Chibbu! Tu theek hai?”

“Uski aankhein num thi….yaar kal jo hua wo dekha nahi gaya…”
Maine Chibbu ke kandhe pe hath rakha….uss raat ko koi soya nahi tha, sab sirf Mayur ke theek hone ki praathna kar rahe the….Log kehte hain ki duniya bahut buri hai, Par shayad duniya buri nahi hai, logo ke dekhne ka nazariya bahut alag hai….

Mayur ke left leg mein open fracture hua tha….Jab Gagan, Chibbu, aur baaki log accident spot pe pahunche Mayur behosh pada tha, Mayur ke pair ke kuch hisse se skin aur muscles nikal gaya tha jiski vajhse uske pair ki tutti hui haddi dikh rahi thi….

Sabhi Mayur ko utha kar City Hospital le gaye. Woh government hospital toh tha par wahan Mayur ko treat karne ki facilities nahi thi….Doctors ne ghaao clean toh kar liya tha par usse treat karna wahaan possible nahi tha….Gagan hospital ke saare paper work kar raha tha. Chibbu, Saagar aur baaki log Mayur ke saath the….Doctor ne clean karte hue haddi ka ek chota hissa nikal kar dustbin mein phenk diya tha….Yeh Chibbu ne notice kiya tha par usse tab tak koi idea nahi tha ki woh kya tha…. Unhone Ambulance bulaayi aur Mayur ko lekar Apolo Hospital gaye…. Wahan Mayur ki haalat dekh kar sab action mein aa gaye…

“Dekhiye aapka dost bahut sensitive stage par hai. Uska operation immediately karna zaroori hai”
“Doctor aapko jo sahi lagta hai aap woh kariye….bas Mayur theek ho jaaye…”
“Mayur ki haddi ka ek chota sa hissa missing hai, jiski wajah se humein operation mein complications honge…humein woh artificially graphics se design karke uss particular haddi ko laga naa padega…jiski wajah se operation ke expenses kum se kum 6 lakh honge…”

“Dr. par 6 lakh abhi laana impossible hai….. Mayur ke parents Khajuraho mein rehte hain unhe 2-4 din lag jaayenge…infact unhe abhi tak pata bhi nahi hai ki Mayur ko kuch hua hai….”
“Toh unhe jaldi bataiye taaki kuch ho sake….hum patient ko aise hi nahi rakh sakte”
“Kya hum aapko kuch paise advance pay karde taaki aap usse operate kar sake aur during discharge baaki ke balance fee pay kar sake?”
“Haan! Waise toh yeh allowed hain nahi, par circumstances dekh kar hum yeh allow kar sakte hain….”
Doctor ne detail mein uss particular haddi ki photo dikhayi jo Mayur ke pair se missing thi…tabhi chibbu ko realise hua ki yeh haddi pehle wale doctor ne laparwaahi se dustbin mein phenk di thi, par ab toh kuch nahi ho sakta tha….

Mayur ke ghar pe mata ki chowki chal rahi thi jab Gagan ka call Mayur ke father ko gaya….Mayur ke father don min ke liye kuch samjh nahi paaye, aankhein toh bhar aayi thi par aasun ek nahi chhalke kyunki Mayur ki mummy ko batana tha, unhe bhi sambhaalna tha agar woh kamzor pad jaate toh ghar pe sab hil jaate…. Akhir ek pita hi toh ek mazboot kadi hota hai kissi parivaar ka, apne kamzor kandho pe duniya ka bojh uthaa leta hai. Pure parivaar ka dhaal ban ke khada hota hai, taaki parivaar par koi mushkil, koi chot naa aaaye ….

Mayur eklauta beta hai. Uncle-aunty ke liye Mayur hi unki duniya hai. Uncle ne jo bhi kamaya, sab Mayur ki khushiyon ke naam kiya; subah tourist guide bane aur shaam mein Mayur ke best friend aur guru…. Kabhi dono dosto ki tarah kushti karte toh kabhi uncle Maths ke sums solve karne mein Mayur ki help karte…. Aunty ka pyaar toh maiya yashodha ke samaan tha Mayur ke liye. Aur bhi kyon nahin unka Kanha jo hai wo. Aunty housewife hain, toh pure din Mayur ki pasand ki cheezein bana-banake apna pyaar bete pe lutaati rehti thi….
Uss din Mayur ke accident ke baare mein sunn ke woh royi zarur par unka vishwas mata rani mein atoot tha… “mata ki chowki ke samay yeh khabar aayi hai Mayur ke papa, dekhna maata ji sab theek kar dengi…mujhe mata rani pe bharosa hai….”

digital marketing for writers
Raat ke 12baj rahe the. Itni raat mein Paise transfer nahi ho sakte the…Mayur ki halaat bahut kharab thi…Sakshi ki mom ko call kiya gaya help ke liye….Sakshi ke mumma se jitna hua unhone help ki….Kum se kum 1 lakh ka bandobast karna tha advance dene ke liye….
Raat mein Chibbu aur Gagan hostel gaye…..puri kahani sunayi, sabhi pareshaan the, niraash the, soch rahe the ki abhi paise kahaan se laayein, kaise jutaayein…tabhi un mein ek bachche ka haath table pe gaya “yeh meri taraf se!!!!” uss ne kahaa….

Sab ne neeche table ki oar dekha toh uss bachche ne 1000 rupaye rakhe the… Sabhi ki aankhon mein chamak aa gayi….. kisi ne apni pocket tatoli toh koi apne kamre ki oar lapka… paise laane….Dheere dheere karke hostel ke saare bachcho ne Mayur ke operation ke liye saath milke 1 lakh ka intezaam kar liya…Kisi ne 500 toh kisi ne 1000…Apne apne hisaab se sab ne help ki…..Unn mein se ek ne toh saathi ke liye jaise apna sab kuch de diya…. 10,000 ( Dus hazaaaaaar) ki madad kar di….Kaha tha naa maine, duniya buri nahi hai, logo ke nazariye ka farq hai….
Chibbu bhaag kar hospital pahuncha….

“Dr….Dr!!!! yeh paise laaya hoon Mayur ka operation shuru kar dijiye please….”
“Par paise kaha hain???”
Chibbu ne ek jacket mein Kohinoor heere ki tarah samaabhaal kar paise baandhe theaur apne dono hatho se use jakde hue tha….
Hospital ke peon/ ward boy se lekar doctors tak sabki aankhein num ho gayi, IHM ke bachcho ke jazbaat dekh kar…..Iss duniya mein insaaniyat ki kami hai kehne walo ko IHM ne aaj uske (insaaniyat ke) bhi darshan Apolo mein karva diye ….

Operation ke procedures shuru hue…Sakshi ki mummy ghar nikal gayi kyunki hospital mein ek insaan ke alawa, kisi aur ko security rehne nahi de raha tha….Finally chibbu hospital mein rukka aur Sagar, Gagan, Sachin Apolo ke lawn mein baith gaye, yeh sochkar ki kabhi bhi kissi cheez ki zaroorat padi toh woh chibbu ki madad karne ke liye haazir rahe….
Raat dhal gayi thi. Teeno lawn mein hi so gaye the…Chibbu neeche aaya call karne ke liye toh dekha yeh teeno lawn mein hi so rahe the…
“Utho!!!! Raat bhar se yahin ho?”
“Haan yaar tujhe koi jarurat hoti toh….hum yahin the”
“Mayur kaisa hai??? Operation ho gaya???”
“Abh main kya bolu…..”
“Abey aise mat bol yaar, bataa na!!!”
“Chalo yaar uski halat mujhse nahi kahi jaayegi ab..”
“Halat matlab? Mayur theek toh haina??”
“Yaar please dimag mat kharab karo aur chalo…”
Chaaro milke upar gaye…Mayur ko ek kumre mein rakha tha, blue colour ka uniform tha aur safed chaadar upar se odhaayi hui thi….
“Mayur!!!!!”

Sab Mayur ke pas gaye aur use ek tak ghoorte rahe….Sagar ke assun ki ek boond Mayur ke chehre par giri…
Mayur ne dheere se aankhein kholi aur ek bheeni si muskuaan di……
Sabne Mayur ke bed ko ghera liya tha aur ek dusre ke kandhe pe hath rakha tha….mayur ka chehra unke neeche tha….jaise koi football team huddle kar rahi ho…
“Abey saale ko bachcha liya!!!!”

Mayur ne dheeme surr mein kaha “jiske tumhare jaise dost hain, usse toh yamraj bhi utha ke nahin le jaa sakte…”
Sab hass pade…. khushi ke aansoo ruk hi nahi rahe the….

Mayur ka operation successful hone ki khushi mein uss din IHM mein laddoo bate ….
IHM ke students ne uss din bata diya tha ki IHM sirf ek institute nahi hai, balki ek parivaar ka surname hai aur hum uss parivaar ke hisse hain…Ek aisa parivaar, jahan ladaai, jhagda, politics toh hota hai, par usse kahin zyada insaaniyat pyaar aur apnapan hota hai….
Paiso ki moh-maya mein duniya apno se, apne parivaaron se ladti rahti hai aur IHM hostel mein sabne apni saari jamaa punji dekar Mayur ko bachchaya….
Yeh hai humara parivaar hai! The IHM parivaar….and believe me I am a proud one to call myself…..Urvashi IHM 18
– Urvashi