IHM Diary – 8

 

Pyaar ke kisse IHM ki corridor mein aise pakte the, jaise thele wali gaadiyo par popcorn. Kuch uchhal kood kar attention grab kar thande pad jaate, toh kuch halak se neeche utar kar bhi digest nahin hote the.. aur kuch hawa ke jhokon ke saath udd jaate … Bada rare hi tha sorted sa pyaar..Par pyaar ki apni imaarat sabhi buland karna chahte the, sabko chahiye tha “Ishq wala love”. Saibhav bhi kab se sachche love ki line mein khada tha…
“Iss baar toh Saibhav tere liye 1st year ke admission process mein ladki chun ke rahenge…” “Haan yaar Uru! Zindagi mein kisi chiz ke liye toh IHM ko yaad karu….Shaadi ke baad kumse-kum apne bachcho ko keh toh sakunga ki beta zindagi mein IHM ne mujhse sirf liya tha par jaate jaate last year mein teri maa ka haath mere haath mein thama gaya…..”Saibhav ne kaha.. Basically yeh “Admission process” har saal college mein 1st year ke admissions ke liye hota tha. IHM.. Hospitality Industry ke IIT jaisa hai toh iske liye bhi aapko All India Entrance exam dena padta hai aur ranking ke hisaab se aapka selection kisi bhi college mein hota hai….Selection ke baad ka jo documentation process hota hai, woh college mein hota hai aur har saal is admission process mein Senior Students faculty ki help karte hain…
Toh IHM mein naye admission ka mausam aa gaya tha. Admission process ka arambh ho gaya tha aur ismein hamaari duty lagi thi. Inkar aur meri position lobby mein reception pe thi. Humara kaam tha un bachcho ke ranks check karna, koi bhi query solve karna aur college ki marketing karna etc etc….Aur yeh kaam bahut hi patience demand karta hai..

Kyun?
Kyunki parents kuch bhi utt patang sawal puch lete hai. Jaise ek ladki ke father mere pas aaye aur unho ne kaha ki beta padhai toh hogayi, naukri bhi hogayi par shaadi ke baad kya? Ab aap hi bataaiye, College shaadi ke baad ki guarantee leta hai? Aise sawaalo ka convincing jawaab ek smile ke sath dena bada mushkil hota hai…

Din dhalta gaya Inkar aur main Saibhav ke liye ek right one ki khoj karte gaye
“Yaar iss baar ladkiyan zyaada aayi hain, haina!”
“Par kya fayda Uru inn mein se ek bhi apne Saibhav ke liye fit nahi hai…”
“Saale tu apne naam ki tarah negative kyun hai…Jab dekho Inkar karta rehta hai aur sab ki duniya mein na-na nahin-nahin ka jhankaar phailaata rehta hai… Koi toh hogi naa! Abhi aur kuch ladkiyon ka aana baaki hai…tu bas apna yeh Inkar wala muh band rakha kar…”
Humara yeh kehna tha jab ek pyaari si ladki apni ek dimple wali smile ke sath hume pukaarne lagi “ Excuse me! IHM ke Admission yahi horahe hain? Main Dimpy Singh hoon admission ke liye aayi hoon…”

“Haayyyeee!!! Guys I tell you kya ladki thi innocence toh shakal se aisi tapak rahi thi jaise saath mein innocence ki manufacturing unit lekar chal rahi ho” Maine Inkar ki taraf muskara kar dekha aur Bassss….. kehna kya tha, aankhon hi aankhon mein saare ishaare hogaye. Bas uski maa thodi hitler type thi humne Dimpy ki maa ka naam rakha diya Mogambo…..

“Dimpy can you please tell me your rank?” maine muskura kar puchha
“Yes ma’m! 258…”
“Aap pehle page pe check kariye….” Uski maa ne mujhe instruct kiya
“Dimpy yeh second column mein tumhara naam hai uske against sign kardo please…” Inkar ne kaha
“Second column kyun first kyun nahi….” Mogambo ne intense voice mein pucha
“Kyunki ma’m dimpy second aayi hai isliye.” Maine ek banavati smile ke sath kaha
“Aise kaise ho sakta hai… aapka data galat hai Dimpy second ho hi nahi sakti….. main usse kabhi second hone de hi nahi sakti…”
“Ma’m I am so sorry! Par yeh sheet Tourism Ministry, Delhi se aati hain hum kuch nahi kar sakte…” Inkar ne kaha
“Dekha isliye maine kaha tha dimpy 16 ghante ki jagah 18 ghante padhne ke liye…ho gayi na second…”
Isliye humne Mogambo naam diya tha aunty ko….Mast suit hota hai na! Ab aap hi bataaiye aisa koi karta hai bhala?
Khair humein maa se kya lena dena tha, humein toh Dimpy aur Saibhav ko milana tha….
Jab tak Inkar Dimpy aur Mogambo ko handle kar raha tha, tab tak main bhaag kar andar AV room mein Saibhav ke pas gayi…
“Abey sunn! Teri wali mil gayi…Kya ladki hai !! Bholi si, Sundar si, Dimple wali smile….Teri perfect match hai yaar Rab ne Bana di Jodi types…. Beta teri toh nikal padi!”

“Kya baat kar rahi hai!!! Mujhe bhi dekhni hai kaha hain…..”

“Lobby mein hain…. Jaldi chal tu hi usko documentation procedure samjha naa…”

College Time

Jaise hi humne AV room ka darwazaa khola saamne Dimpy khadi thi…. Saibhav ke Dil mein violin bajne lage…. Maano woh khud ko Shahrukh Khan aur Dimpy ko Kajol samjh raha ho…Dimpy ke baal halke halke se lehra rahe the…Dono ki aankhein mili, Dimple wali smile share hui…Dimple kamre mein apni maa ke saath enter hui aur Saibhav ne mujhe dekha “Kya choice hai yaar! Yahan se main handle karta hoon…”

Saibhav ne apni gentleman wali jaadu ki chhadi ghumai, par beti ke patne ke bajaye galti se beti ki maa patt gayi, I mean Mogambo patt gayi…..

“Yaar kismat hi kharab hai meri…” Saibhav ne reception pe aake kaha…

“Kyun? Ab kya hua?” maine pucha

“Jisko pataana tha woh nahi pati par uski maa patt gayi…” Saibhav ne dukhi hoke kaha

Maine aur Inkar ne sarr peet liya…

“Tera kuch nahi ho sakta! Teri personality se toh aunty hi patt sakti hai…” Inkar ne hass ke kaha

“Koi nahi college shuru hone de phir dekhte hain kya kar sakte hain….” Maine kaha

Raat ho gayi thi. Campus aane wala tha aur Saibhav uski tayari mein padhai karne baitha hi tha, ki uske phone pe ek notification aaya – Dimpy Singh sent a friend request on facebook…. Is notification ke baad Saibhav ki khushi ka aalam ye tha ki Iss baar violin nahi poora philharmonic orchestra bajne laga tha. Saibhav saatve aasmaan pe udd raha tha. Usne request accept ki aur Dimpy ka message aaya.

“Hi!”

“Hello!” Saibhav ne kaha

Saibhav ne sakht banne ki poori koshish ki, par anth mein wohi hua joh har ladke saath hota hai….woh pighal gaya…

Uske raat raat bhar baat hoti rehti thi, Dimpy apne relationship ki kahaniyan sunati rehti thi aur Saibhav bade hi interest se sunta rehta tha….Ek raat…

“Dimpy iss college mein Freshers party tak saare seniors bahut pareshan karte hain…jaisa tumhara intro kabhi bhi le lenge, kisi bhi senior ka naam yaa unhone kaha se training ki hai wo pooch lenge aur hostel ke common room mein bhi kuch naa kuch chalta rehta hai…. Toh tum sambhal kar rehna, waise toh main sabko inform kar dunga ki main tumhe jaanta hoon toh pareshaan nahi kare…”

“Saibhav aap kitne achche hain…. Aap jaisa boyfriend kaash mere pas hota…. Aap mere liye kitna kuch kar rahe hain. Thank you so much, it makes me feel so special!”

Bas Dimpy ka yeh bolna tha aur Saibhav apni family ke sapne Dimpy ke saath bunne laga…Saibhav ne next day saari ladkiyon se ek hi cheez kahi

“Guyz kal ek ladki aarahi hai Dimpy Singh…. Uske saath kaand mat karna please Tumhari hone wali bhabhi hai….Bas woh aa jaaye phir main usse propose kar dunga aur apni puri Zindagi uske naam kar dunga..”

“Saibhav tu sure hai na? Kahin yeh bakiyo ke tarah nahi nikle…. Tujhe pataa kar yeh intro se escape ho jaaye aur phir tujhe friend zone karde…” Vipasna ne mazzak mein pucha…

“Tu paagal hai? Be positive! Dimpy waisi nahi hai, jaisa tu samjh rahi hai…iss baar toh sab sure hai.. dekhna….” Saibhav ne kaha

Dimpy ne college mein entry maari aur har ladki ne use literally comfortable kiya, dosti ki, kisi ne us se utt-pataang sawaal nahi puchhe, intros nahi liye….

“Abey tum log sab ko pakdte ho. Is Dimpy se kyun nahi kuch puchte ho?” Chibbu ne pucha

“Humari hone wali bhabhi hai, Saibhav propose karne wala hai use…. Usne request ki hai…Dimpy ko chod dene ke liye..” Vippo ne badi seriously jawab diya

“Pagal hogaye ho kya? Woh apna kaam nikalwa rahi hai….Abey Dimpy ki Shakal dekh aur phir apne Saibhav ki dekh… Tujhe lagta hai woh iss chamche ko haan bolegi? Beta kuch nahi, tum logo ko bewakoof bana rahi hai…” Chibbu ne apni vishesh tippani dena.. uss waqt uchit samjha

Waqt beetata gaya Dimpy aur Saibhav ki nazdeekiyan badhti gayi…. Saibhav flute baja raha tha, jab Dimpy uske baju mein baith gayi aur uss ne Saibhav ka hath pakad ke kaha

“Aaj tak kabhi bhi kisiko maine itni acchi basuri bajaate hue nahi suna hai…aapke baju mein baith kar aisa laga raha hai jaise aap Krishna aur main aapki…” Dimpy sharma ke bhaag gayi aur Saibhav ne mann hi mann sentence complete kar liya…

“Main Krishna aur tum meri Radha…Aaj toh apna haath bhi nahi dhounga, tumne jo mujhe chhua hai…”

Freshers khatam hogaye aur finally Saibhav ne message kar ke dimpy ko milne bulaya…Dimpy sharmate hue Saibhav se milne aayi, Saibhav bahut nervous tha, yeh uska first proposal jo tha….

“Dimpy mujhe tumse kuch kehna hai…”

“ Mujhe bhi aapse kuch kehna hai…”

“ Kaho Dimpy kya kehna hai…”

“Aap ne college mein mera itna dhyaan rakha, seniors ke sawalo se bachaya, mere dukh mein mera saath diya…kitni raatein mere naam kar di, jab main maa ko miss kar rahi thi…Thank you so much…”

“ Pagal ho kya Dimpy! Thank you mat kaho. Maine pehle hi kaha tumse aisa lagta hai ki tum mujhe apna samjhti hi nahi ho….”

“Nahi nahi aap aisa mat kahiye aap apne se zyaada hai bahut zyaada….ek aisa insaan jiski jagha koi nahi le sakta meri zindagi mein…”

“Dimpy mujhe tumse kuch kehna tha joh main bahut dino se tumse kehna chah raha tha par keh nahi paaya….”

“Saibhav sir mujhe bhi aapse kuch aur kehna hai…”

“Done! Toh ek sath ek dusre ko keh dete hai Dimpy…”

“Done sir!”

1….2….3… dono ne ek sath ek dusre ko yeh kaha –

“Will you be my girlfriend?”

“I have a boyfriend!”

Ouuccchhhh!!!! Kya padi hai Saibhav ko….

“Saibhav sir I love you but as friend…aaj hi mere batchmate ne mujhe propose kiya jiske sath main nazaro hi nazaro mein baatein karti thi jab freshers se pehle ladke aur ladkiyon ka baat karna allowed nahi tha…”

“Koi nahi! Mujhe jana hai, housekeeping lab mein bahut kaam hai…”

Saibhav wahan se nikal gaya aur girls locker ke bahar aake khada ho gaya….main bahar nikli

“Arey tu yahan putle ki tarah khada ho ke kya kar raha hai…”

“Tera phone kyun nahi lag raha? kabse call kar raha hoon tujhe..”

“Kyun? kya hua Baba? Itna upset kyun lag raha hai ?”

Saibhav mujhe kheech kar college ki terrace pe le gaya aur gale milkar khoob roya

“Saibhav kya hua batayega…”

“Yaar !! Chibbu sach keh raha tha! Bandi chhod ke chali gayi…”

“Matlab? Kya hua”

“Dimpy ne pyaari pyaari baatein mujhse ki…Uska dhyaan maine rakha, par pataa ke koi aur le gaya…”

Waise toh Saibhav ki haalat dekh kar badi hassi aarahi thi par maine control kiya…

“Arey yaar! Hota hai.. Koi nahi sab theek ho jayega… Sab moh maya hai! Ek din woh waapas zaroor aayegi”

“Uru tu hi ek meri acchi dost hai…tu mere sath aisa mat karna” rote rote Saibhav ne kaha

“Tu pagal hai kya! 2.5 saal se tujhe jhel rahi hoon. Tujhe lagta hai teri harkaton ki wajahse se tujhe chodke jaaungi…chill maar life mein aisa hota rehta hain…kahi na kahin iss duniye mein teri wali bhi tera intezaar kar rahi hogi…”

“I hope jaldi mil jaaye…”

“Abey tab milegi jab tu ladkiyon ki tarah rona band karega….chal yeh sab chod tujhe mast gossip sunati hoon…tere dushman ko dewaar kudte hue Tinda ma’m ne pakad liya…Lobby mein Tinda ma’m hungama kar rahi hai”

“Kya baat kar rahi hai? Chal neeche chalke dekhte hain” apne aassun pochte hue Saibhav kehta hain…

“Chal bhai tujhe chicken momos bhi khilati hoon ….”

Main aur Saibhav ek dusre ke kandhe pe hath rakh kar Tinda ma’m ka naya entertainment dekhne ke liye nikal gaye.

-Urvashi