Woh 7 Students!

IHM BLOG – 13

Har college ke Rules, regulations lag bhag same hote hain par yeh follow kitna hota hai, ye dekhna bada important hota hai…..Believe me! IHM ke official rules kya.. unofficial rules bhi bade kaayde se hamaara college follow karta hai. Yahan mood swings ke sath unofficial rules, regulations ki ijaad hoti rehti hai….aur jaise ek baar teer kamaan se nikal kar wapas nahi aata, jaise toothpaste tube se nikla hua paste wapas tube mein nahi jaata, waise hi college ke kisi cabin se nikal kar rules ek baar notice board pe chipak jaaye toh woh wahan se nikal nahi sakta….

Toh is college ka ek rule hai, jo students ki raato ki neend aur din ka chain udaa deta hai, woh hai.. 75% attendance….Poora nahi hua toh detention ki 100% guarantee. Agar briefly explain karu toh yeh rule unn aalsi bachcho ko target karta hai, jinhe har din apna bistar chodkar, subh subh college aake, frustrated bachcho ki shakalein dekhne ka aur wahi tinda ma’am jaisi faculty ke ghise purrane lecture sunne ka mood nahi hota…In mein se ek main bhi thi!! Yeh rule har bachche ko college attend karne ke liye majboor karta hai kyunki agar aapka attendance 75% se kum hua toh aapko exam nahi dene dete hain, aur phir aapko apne juniors ke sath baithke saare lecture attend karne padte hain, aur apna attendance kam se kam 75% karna padta hai.. Kai students iss rule ke darr se lectures attend kar lete the, par kuch mere jaise dheeth, aalsi, daring wale the joh phir bhi attend nahi karte the….phir mere jaise bachcho ki dheeth prajati se chunn-chunn kar bachcho ko detain kiya jaata tha.. waise aaj tak main detain nahi hui….ab yeh mat puchhiyega kaise (CG wala khayal toh dimag mein laaiyega bhi mat….)

1st year ke 1st semester ka last day tha, jab last attendance list nikli…..kuch khush the, toh kuch apne dushman ke detain nahi hone pe shok mana rahe the, humare batch se 7 students detain hogaye the….Agle din se exams shuru hone wale the, jo bachche detain hue the unki haalat kharaab hogayi…

“ Yaar yeh toh scene hogaya!!! Ghar pe kya bolenge….”

“Jab ghar se call aata tha, maa lecture mein hoon bolke phone cut kar dete the. Ab sabke sawal ka jawab kaise denge???”

“Abey pagal ho gaya hai kya, bina vajah ke tension le rahe ho….hum college ke bahar dharna denge, koi bachcha college mein exam dene nahi jaayega….attendance koi cheez nahi hoti humein detain karne ke liye…main bhi dekhta hoon humein yeh kaise detain karte hain”

“Chalo bhaiyo dharne ki taiyari karte hain….”

Chaude hokar Ikrant, Serat, Tubin aur inki gang apne ghar chale gaye dharne ki tayari karne…..amazing baat toh yeh thi ki attitude toh tha “hum duniya badal denge” wala, par muheem ka maqsad tha detain hogaye dosto ko bachaana…Waise inn teeno mein se koi detain nahi hua tha, matlab is dosti ki gehrai toh dekhiye, is sacrifice ki unchaai ka andaaza to lagaaiye, kal exam hai aur yeh padhne ki nahi, dharne ki taiyari kar rahe hain…..

Raju ke galle pe baith kar aaram se sutta phukka gaya, chai pee gayi aur kal subah ka plan of action decide hua….

“Bhai log kal humara bahut bada din hai….aur humein isse execute bahut planning se karna hoga”

“Main aur ek aur koi jan saare bachcho ko call karke inform karna shuru kar denge ki kal exam mein koi nahi jaayega sab dharne pe baithenge…”

“ Tubin tu bahut creative hai tu ek dum creative posters bananaa….matlab aisa ki dekh kar sab hil jaaye….”

“Done! 12 bana deta hoon…. Chalega?”

“Arey haan daudega..”

“Aur koi slogans nikalo…”

“Slogans kyun???”

“Arey wahi toh main hain….”

“Slogan kyun bhai? Hum log gaali denge naa …kami thodi na hai gaaliyon ki…mast moti-moti denge…. !!!”

“Tu pagal hai…Hum duniya ke bachcho ko represent karne jaa rahe hain…achcha thodi na lagega ki history ki kitaabo mein jab humare dharne ka chapter hoga toh uss mein likha hoga ki inho ne gaaliyan deke dharna diya tha aur aaj bachcho ko inki wajahse azaadi mili hai….. bachcho pe kya asaar hoga yaar… humein woh bhi toh sochna hoga….Duniya ke bachcho ka future humare hathon mein hai…”

“Bhai yeh toh sahi baat kardi aapne!!! Main achchhe impactful slogans dhundhunga….”

Jiss josh mein discussion hua, usse kahin zyaada josh mein subah ke 5 baje tak bhookhe, pyaase dharne ka kaam chala… background music mein sabke man mein baj raha tha “sarafaroshi ki tamanna ab humare dil mein hai” auto repeat mode mein chal raha tha….. Trust me! Yeh dharne ko lekar itne serious aur energetic the ki agar yeh Britsh raj ke time paida hojaate to itne saalo tak India ko Britishers ki ghulaami nahin karni padti, Ye log toh 6mahine ke andar hi Britshers ko india se bhaaga dete….

Khair chhodiye… Inke dharne ki baaton se maahaul itna charged up ho gaya tha ki laga, kahin Next day, Suraj bhi dharna nahin de de…

Par subah waqt se hui… taiyaari pakki thi…

“Bhaiyon! Posters ready?”

“ Ready!” sab ne ek awaaz mein chilaa te hue kaha

“ Dande le liye?”

“Yes!!”

“Bike ki chabhi?”

“Le li!!!”

“ Inquilab???”

“Zindabad!!!”

12 bikes ka intezaam karke yeh college ke gate ke bahar khade hogaye….8 baj rahe the aur 9 baje exam tha….

“NAHI SAHENGE!!!! NAHI SAHENGE!!!!

ATTENDANCE KE UPAR DETENTION… NAHI SAHENGE!!!”

“EXAM DENA HUMARA JANAMSIDDH ADHIKAR HAI, AUR HUM EXAM DEKAR RAHENGE!!!”

“AB BHI JISKA KHOON NAHI KHAULA, KHOON NAHI WOH PAANI HAI, JOH DETENTION NAA ROKK PAAYE, UNKI BEKAAR JAWANI HAI!!!!”

Ek surr mein sab chilla-chilla kar yeh kehne lage……Teachers kaa aana shuru ho gaya tha…Saare teachers weird reactions de dekar andar jaa rahe the…..Finally Principal sir aaye, unki gaadi bina rukke college ke andar chali gayi aur woh yeh ignore karte hue apne cabin mein ghuss gaye…Achanak se sab khamosh hogaye..
“Ikrant bhai! Yeh toh humara pachka hogaya…..unho ne toh humari taraf dekha bhi nahi”

“Areyyy!!! Chill kar yeh unki sazish hai…hume ignore karne ki…bhaiyon demotivate naa ho…bas ek jutt gaate raho nahi sahenge, nahi sahenge….”

8:30 baj rahe the jab Principal sir saare faculties ke sath gate par aake khade hogaye…

“Security!!! 8:45 ke baad gate band kar dena….koi bhi uske baad college mein exam dene ke liye enter nahi kar
sakta…” Principal sir ne unchi awaaz mein indirectly “The Dharna Gang” ko address kiya….

Jitne bachcho ko call kiya tha dharna mein participate karne ke liye unka aana shuru ho gaya tha…Sab Ikrant ko muskura kar dekhte, phir detain bachcho ki shakalein dekhar kar andar ghuss jaate…..Ikrant aur uski gang ne apna hausla buland rakha aur dharna dete chale gaye…

Tabhi aayi wo, jisse sabko badi ummeedein thi, jo agar andar nahin gayi toh 100 ladke to baahaar aa hi jaayenge aur faculty ko ye faisla waapas lena hi hoga.. Wo aayi to sane badi ummeed se uski oar dekha… Wo muskuraayi, badi hi josh mein sabko “ Hi” kahaa… Usne posters dekhe aur chahak ke kahaa… Wow!! very nice.. Kisne banaaya ? Ab toh sabko laga ki ye dharna successful hogaya … Tubin ne aage badh ke bataaya, ye uski creativity hai. Wo aage badhti gayi… Sabko laga, wo kuch bada action plan hai iske paas, kuch dhamaal karne wali… Par wo gate se andar chali gayi. Sabhi soch rahe the.. wo ab kuch karegi, tab kuch karegi… Par wo toh andar hi chali gayi, palat ke bhi nahin dekha … Sabhi shocked the….

Jab tak unhein hosh aaye tab tak Gate bandh karne ke liye security chamber se nikla, gate pakad kar bandh karne ke liye aage badh raha tha, Kuchh aur andar ghus gaye… Gate ki awaaz shuru hui, badi sharp thi, dhul udi aur gate bandh hogaya!!!

Dharna gang mein 24 students the!!! Sochiye 24 students!!! Un 24 mein se sirf woh 7 bachche bahar reh gaye the, joh actual mein detain hue the….Baaki sab posters aur dande neeche phenk kar college ke andar exam dene ke liye bhaag gaye aur inn mein se ek Ikrant bhi tha…
Saaton detained bachcho ne ek dusre ki shakal dekhi…

“chal bhai hum bhi chalte hain, bhookh lagi hai aur neend bhi aarahi hai….”

“Arey pata hai, woh insta wali laundiya ne meri request accept kar li, meri taraf se aap sab bhai logo ko Raju ke
galle se sutta aur chai ki treat!!!!”

“Badiyaa hai! Raju bhaiiiii!!!!! 7 kadak chai…..”

Urvashi