IHM – 7 ki Daastan-e-Mohabbat

Pyaar, ishq, mohabbat, love, romance! Haaayyyeee!!!! Inn saare alfaazo mein kitni chumbakeey shakti hai….. Kitne sundar shabdh hain yeh….Ek hi pal mein aap poori zindagi inn shabdon ke naam kar dete ho, ek anjaan par apne parivaar se zyaada vishwaas karte ho, itna ki kuch bhi ho, par aap uski zindagi se kabhi door nahi jaoge (you know made for each other concept)….. IHM ki hawa bhi kuch aisi hi thi, iss pyaar ke liye koi itna pagal ho sakta hai pata hi nahi tha…..

Saman! College ke har faculty ka favourite tha. Har bachcha Saman ki bahut respect karta tha, pyaar karta tha…..Par saman ka favourite, Uska pyaar koi aur hi tha…. Uski ankhein badi sundar hain, lagta hai ussi ki aankhon mein dekhta rahun, uski woh ek muskurahat ke liye apni jaan qurbaan kar doon.. yaarrrrr!!! Mess mein baith kar Saman mujhe apne pyaar ki dastaan suna raha tha aur main table pe tike apne dono haatho pe apna gaal rakh ke aadhi neend mein aa gayi thi.

“Beta!! Jaan desh ke liye Qurbaan karega toh Amar kehlaayega aur agar pyaar mein  karega toh raaste ka majnu kehlaayega! Mujhpe rehem kar, please…. mujhe raste ke majnu ka best friend nahi banna….Aur waise bhi history gawaah hai yeh one side love se kuch nahi hota….usse bhul jaa! Live your life happily and Single…” yeh bolkar mein mess se chalti bani, par Saman ke dimag mein kuch nahi gaya “pagal wahi toh mohabbat hai…Ab kya samjhaana kisi ko ki pyaar mein kitni taaqat hai”.. Usne peechhe se kaha… aur maine respond nahin karna hi theek samjha

Woh  pagal tha uske liye… Aur yeh sab jaante the. Bas usse hi iss baat ka ehsaas nahi tha, jiske liye wo mara jaa raha tha… aur agar tha bhi toh usne kabhi uss baat ko jataya nahi…. “Sunn sunn Kuhu! ek week mein Gudiya ka birthday hai…” Main corridor mein Pranay sir ke lecture liye bhaag rahi thi, jab Saman ne mera haath pakad ke kheecha aur yeh kaha….“toh main kya karu? Mera birthday yaad hai? woh  jo koi nahi hai, Uska yaad hai aur Main jo teri best friend hoon, Uska yaad nahi…! Waaahhhhh!!!  Mujhe Pranay sir ke lecture ke liye derr horahi hai chod mujhe….” Yeh keh kar main chidh kar nikal gayi aur Saman apne pyaar wali duniya mein phir kho gaya “ Yaar uska birthday kya, woh  kaunse din kitne baje mere baaju se nikli hai uska bhi date time yaad hai yeh toh uska birthday hai….” Saman khudse hi baat karte hue college ke corridor mein chala jaa raha tha……Use uske B’day ke liye kuch bahut hi special plan karna tha, kuch aisa  jo kabhi kisi ne naa kiya ho….

Shaam mein Saman apne ghar gaya….uske saath humare teen aur batchmates rehte the Titesh, Jagan aur Waza. Uske partner in crime the wey ……Saman kuch chahe aur woh  teen use nahi kare aisa ho hi nahi sakta, dosti se bhi kahin zyaada strong rishta tha unka….Puri duniya ek taraf aur yeh chaar ek taraf….

Saman boxer aur baniaan mein chaar gaddo(mattress) par ucchal kar chadha aur haath mein kaanch ki bottle pakdke bola “suno suno yaarooooo….. Tere bhai ke pyaara ka mamla hai…..” “Ohhhoooo! Usse propose karna hai kya? Shahrukh Khan style mein karna, jab tak hai jaan wali kavita bolna…..Nahi rahunga main jab tak hai jaan jab tak hai jaan…” Titesh ne haath phaila kar Shahrukh Khan ki mimicry karte hue kaha….

“ Arrzzz hai! Sirf mujhe nahi mera nazariya bhi badal diya……teri ek muskurahat ne to mera khuda hi badal diya!” Humare college ke iklaute shayaar the Waza. Har ladke ke dil ka haal apni shaayari mein bayaan karne ka bahut hi sundar talent inn mein tha……. “Arey nahi nahiiii! Uska birthday hai ek hafte mein kuch solid plan karna hai uske liye…..aisa kuch jo use humesha yaad rahe, matlab kuch aisa ki bina bayaan kiye uss ke dil tak meri dil ki baat pauhch jaaye….” Saman phir apni duniya mein kho gaya…..  “Yaara! Kal jo picture dekhi thi uss mein yaad hai Sky Lanterns udaye the…..woh  kar sakte hain….soch kitna sahi lagega pagal hojayegi tere pyaar mein yaara….ek baar soch…” Jagan inn sab mein maahir tha… flirt, romance sab uski hobby thi in short Saman ka love guru tha woh ….

“Haan yaar yeh idea accha hai! Par karenge kaise woh  hostel mein aur hum bahar….” Titesh ne apni mann ki shanka shabdho mein bayaan ki…. “Aur kitne uddayega ek? Do? Teen? Aise! yunn gayab hojayega aasmaan mein….Mujhe lagta hai kuch aur sochna padega”….. “ 150!” “Kya 150?” teeno ne ek sath Saman ko dekh kar pucha toh Saman ne badi shaan se kaha “ek nahi do nahi pure 150 uddenge! Aur 6 sky lanterns mein Gudiya ka naam hoga….ek lantern mein uske naam ka ek alphabet…Sahi hai yaar kya idea hai Jagan!….. teeno yeh sunn kar hairaan the par Saman ke liye toh kuch bhi possible tha yeh toh bas 150 sky lanterns uddane ki baat thi….. “50 junior localites main khaada kar dunga sky lanterns uddane ke liye…” Titesh ne josh mein kaha “Haan! Iss sheher mein raat ke baarah baje tyohaaro sa manzar hoga …..Asmaan ko lanterns se saja denge, dekhna…..” Waza bhi iss plan mein shaamil ho gaya, Jagan ne uchhal kar kaha  “lanterns ko taiyaar karna, 25 aur juniors ko khada karna meri zimmedaari…..Iss baar toh Gudiya saamne se aake bolegi  Saman I love you…Kasam se!”

“Haan yaar bas yahi ho! Uski khushi mere liye khuda ko khush karne jaisa hai….” Saman ki aankhein chamak rahi thi, “Wwwwaaahhhh kya bola hai! iss par toh group hug banta hai….”

Yeh chaaro rehte the college ki bagal wali society mein aur inka D-801 ek aisa flat tha jisse girls hostel ki restricted balcony dikhti thi….. “Yaar apni balcony se udayenge toh sahi se nahi dikhega….hostel 3 maale ki aur hum 8th floor ki itni choti si balcony mein…. kaise karenge?”Waza ne kaha “ bhaijaan!!!!! Uska idea mera paas hai….Saman iss building ki terrace pe mein tu Jagan aur hum khade rehte hai…. society ke baaki blocks mein 25-25 juniors ke fauz terrace pe bhej dete hai aur har direction se wey sky lanterns ek sath udayenge aur hum 4 Gudiya ke naam ke lanterns udayange….” “Abey Titesh sahi idea diya hai tune! 75 juniors hain humare pas….150 lanterns aaraam se ho jayenge.. agar aise divide karenge toh. ” Bas kya tha… Cheers !! Cheers !!!

Agle din inn chaaro ki fauz pahunchi college….Gudiya ke best friends Meeta aur Kruti ko pakadne….. “Sunn Meeta! Yeh Kruti kahan hai? Tum dono se kuch zaroori baat karni hai….” “mere pocket mein hain ruk abhi nikalti hoon…” Meeta ne pocket mein hath daal kar dhundna shuru kiya “ Mazak mat kar Meeta… Bahut important hai…” “Yaar mujhe nahi pata tha ki Meeta ki pocket mein Kruti fit ho jaati hai….” Jagan ne zor se haste hue kaha . Tabhi Saman ke kandhe par kisi ne tap kiya. Saman palta toh Kruti khadi thi…. “kya ho raha hai mujhe koi batayega….” Kruti ne kaha…Saman un dono ko kheech kar basket ball court le gaya taaki koi unka plan sunn na sake.. Saman ne jhatpat idea bataaya aur unse help maangi… Dono chehak uthi, “Waah!! Saman idea toh sahi hai… Done tu hume call kar dena hum aajayenge”

Finally shaam mein Saman pauhcha market mein pataakhe wale ke paas “Bhaiya sky lanterns hain?” “Yeh kya hota hai?” dukaan-daar ne kaha

“Arey bhaiya woh  paper ka bana hota hai…jiss mein candle daalte hain…phir woh  uddta hai hawa mein…”

“accha woh  jo ek dum upar uddta hai”

“Haan bhaiya”

“woh  jo saare log uddake khush hojaate hain aur angrezi mein awww!! Wow!!! Shooo beeuutiiphhooll kehte hain….”

“Haan haan bhaiya”

“Wahi naa jo gubbaare ki tarah dikhta hai aur garam hawa se upar jaata hai?” “Haan!!! Haan! Haan wahi bhaiya wahi.. garam gubaara hai aapke pas?”

Dukaan daar ne shaq ki nazaro se Saman ko upar se neeche dekha aur sar hilaa ke kaha “ Naa ji! Nahi hai! Iss sheher mein sky lanterns ban hain. aapko pata nahi?” Saman ko jhatka laga… 440 volt ka nahin… 440 multiplied by 150 ka.. har lantern ke liye ek shock….badi mushkil se uski aawwaz nikali “ Yeh kab hua bhaiya?”

“Yahi koi ek saal ho gaye bhai saab…”.

Saman ko iss dukaandaar par vishwas nahi hua. Usne ek ek kar saari dukaano mein poochha… par ek hi jawab mila ki sky lanterns ban hai. Niraash  Saman ne ek aakhiri try maari..

“Chachaa jaan!! Aapke paas sky lanterns hoga kya? Please naa mat kahiyega”

“Bhaiya aap police wale ho?” Dukaan ke budhe aadmi ne pucha

“Nahi kyun?”

“Toh kya aap army ke ho?”

“ Nahi! Main aisa lagta hoon ? ”

Uss aadmi ko Saman police wala lag raha tha… “Nahi…Par sahib. yahan kahin nahi milega lanterns. Ban hai yahan…”

Saman dukhi hoke chalte bana. tabhi usse budhe ne usse bulaya aur poochha “ main kaise maan loon aap police nahi ho?” Jawaab mein Saman ne college ki dikha di.. “Dost hoon..Police nahi hoon…Dost ko gift deni hai. Use bahut pasand hai” uski awaaz se dukh bahar jhaank raha tha. Boodhe aadmi ne bidi phoonki aur kaha “Sky lanterns mil jaayenge, kitne chahiye aapko?”

“150…aapke paas kitne hain?”

“3 din lag jaayenge 450 rupaye ka ek padega. waise toh 500 mein deta hoon, par aap ke liye 450 kar diya…” Saman daam sunn ke palat gaya

“Arey sahab ruko kaha jaa rahe ho..”

“nahi chahiye aapse 450 ka ek… mujhe 150 lanterns chahiye samjh rahe hain aap aur uske upar se 3 din…. Mujhe abhi chahiye raat mein uddanaa hai”

“Sahab aap daam batao kitne mein loge?” Love mein jaisa bhi ho par apna yaar toh Bargaining ka baadshaah hai. Kam kara kara ke wo keemat 50 rupaye pe le aaya…. “Bhaiya 150 lanterns abhi hain aapke paas hai?”

“Mere pas sirf 25 hain sahab?”

“Baaki ke Lanterns main kaha se laaun ? Mujhe toh aaj hi chahiye…”

“Arey sahab kyun pareshan hote ho….Aap paise abhi bharo aur Adhe ghante baad woh  saamne ped ke paas se aapko aapka saamaan kaagaz mein lipta hua mil jayega usse chup chaap leke nikal jaaiyega aur kisi ne aapko iske sath pakda toh humari dukaan ka naam mat bataana….”

“Par aapke pas toh 25 hi hain baaki ke kahan se laoge”

“ wo hamara masla hai…hum pe chhod do..” yeh bolkar budhe aadmi ne zorse seeti bajaayi… aur wey sabhi dukaandaar budhe aadmi ke pas aakar khade hogaye jinhone kuchh der pehle Saman ko lanterns ke liye mana kiya tha…Saman toh hairaan reh gaya. Uss ne chupchaap pure paise bhare aur wahan se nikal gaya….

Saman ne Jagan ko call kiya “Bhai setting hogayi hai par ek problem hai..” Saman ne puri kahani Jagan ko sunayi. Jagan ek batch mate ki gadi lekar market pahunch gaya…Aur uss budhe aadmi ke diye instructions ke mutaabik Saman aur Jagan lanterns lekar market se nikal gaye… Par dono ke dil mein dar issi baat ka tha, ki kahin check naake pe pakde naa jaayein…Par aksar aise adventure mein kismet bhi saath de jaati hai..we dono safely ghar pahunch gaye…

Sari taiyaari ho gayi. Plan ke mutaabik 75 juniors ne terrace pe apne position le li. Is beech Titesh ne Kruti ko bula ke Gudiya ke liye Saman ka surprise gift bhej diya… Meeta continuously Saman ke contact mein thi.. achaanak usne kaha

“Saman ek problem ho gayi yaar..”

“Kya hua?”

“Dono ma’m abhi tak soyi nahi hain, keh rahi hain Gudiya ko wish karke soyengi….” “Arey yaar! Koi nahi hum ek baje ka time rakhte hain jab ma’m so jaayengi…”

“Done. Main tujhe paanch minute pehle update kar dungi….”

“Done! Accha cake cutting ke time mujhe video call kar dena, toh main bhi wish kar dunga. Usse lagna nahi chahiye ki maine wish nahi kiya warna woh  samjh jaayegi ki main koi surprise dene wala hoon…. 12 baj gaye Gudiya ko sab ne wish kiya, cake cut hua, Saman ne video call pe Gudiya ke liye birthday song gaaya..Finally warden ma’m aur Raksha ma’m sone gayin…. Meeta aur Kruti ne Gudiya ki aankhon par patti bandh di aur phone pe kaha “Saman hum usko lekar aa rahe hain…” yeh sunn kar Gudiya naaraaz ho gayi “Saman hostel mein hai?” Gudiya ne Meeta se phone maanga aur Saman par chillaane lagi “Saman agar tum mujhe girls hostel mein dikhe naa, toh dekhna main kabhi tum se baat nahi karungi…”

“Arey baba Gudiya! Main apne ghar pe hoon main hostel mein kyun aaunga ladke thodi naa allowed hain girls hostel mein..” Saman building ke terrace se jhaank ke dekh raha tha Gudiya ki aankhon pe patti bandhi thi aur usne Kruti aur Meeta ka hath pakda tha… ussi ke peeche Siya aur Ayuri bhi aa rahe the aur dekhte hi dekhte poori girls hostel ki ladkiyan aakar restricted area mein khadi ho gayi… Waqt bhi iss nazaare ko dekhne ke liye jaise ruk gaya tha…Saman ne ishara kiya. Idhar Gudiya ki patti khuli, udhar lanterns aasmaan mein udne lage. Gudiya ne Aasmaan ki oar dekha… Saari ladkiyon ne shorrr macchanaa shuru kardiya…Uss din Aasman ko jhilmilate taaro ki zaroorat nahi thi, Chand ki sundarta bhi pheeki pad gayi thi….144 sky lanterns aasman mein jhilmilaa kar Saman ka pyaar  Gudiya ke liye bayaan kar rahe the….aur phir Waza, Titesh aur Jagan ne Gudiya ke naam ke lanterns ek saath uddaye….Hostel ki saari ladkiyan emotional ho gayi.. unki aankhein bhar aayin….Aaj tak kisi ladki ne apne pyaar ke liye aisa nahin kiya… naa toh kabhi kisi ne aisa kuch dekha tha yaa suna tha…

Gudiya khushi ke maare ro padi, uske paas shabd nahi the…. Saman ne video call kiya toh Gudiya ke jazbaat umad pade….. “Thank you Saman… Thank you thank you.. aaj tak kissi ne mere liye aisa nahi kiya….I am feeling so special. yeh mere jeewan ka best birthday hai! Thank you for making it sooooo special….” Saman ki khushi ka thikaana nahin tha ki finally uski mehanat rang laayi…..Finally sab apne apne kamre mein chale gaye….Itni aawazein sunn kar Raksha ma’m uth gayin, unki kamre ki batti jali….. “Abey sab chuppo Raksha ma’m jaag gayi!!!!!” Jagan ne chilla kar terrace pe khade sabhi juniors se kaha…. Sabhi terrace pe lett gaye taaki Raksha ma’m kisi ko naa dekh le…Raksha ma’m torch leke restricted area pe pahunchi aasman ko iss rang mein dekh kar woh  baukhla gayin aur unho ne torch saamne ki building ki terrace par ghumaya toh koi nazar nahin aaya…. kuch der baad  jab sab kuch shaant ho gaya, toh sab rengte hue terrace se bahar nikale.. aur ghar chale gaye.

Meeta aur Kruti ka rote-rote phone aaya “Saman kya insaan hai tu yaar….Please humare boyfriends ko bhi yeh sab sikhaa de. Humare liye koi aisa karta toh date-wate chhod ke hum toh shaadi kar lete usse” Saman ko boys hostel se call aana shuru hua “Saale aisa kya kar diya tune??? Saari ladkiyan Humein phone karke bol rahi hain Saman ki tarah bano, Saman se kuch seekho” Thodi gaaliyan mili, toh kuch shabd pyaar ke, appreciation ke bhi sunne mile… ye sab abhi shaant hua hi tha ki Raat ke 3 baje …Sabke so jaane ke baad Gudiya ne Saman ko call kiya

“Saman yeh sab kya tha?”

“Kyun achchha nahi laga?”

“Accha? Saman itna accha laga ki mere paas shabd hi nahi hai apni khushi bayaan karne ke liye….”

“Bas mere liye yahi kaafi hain..Gudiya”

Maahaul set tha. Saman wo sunne ke liye betaab tha, jiske liye usne itni mashakkat kit hi, itna risk liya tha… aur wo lamhaa aa bhi gaya… Gudiya boli.. “Saman…” Gudiya ruk gayi… Saman ka dil jaise tham gaya… is anticipation mein ki ab sunaayi denge wo word… aur phir Gudiya ne emotional ho ke kaha…

“Diya leke dhoondhungi naa, toh bhi tum jaisa better insaan mujhe nahi mil sakta apne liye….Main toh Bhagwan se yahi praarthna karungi ki tum jaisa bhai meri tarah har ladki ko mile….”

“Kya kaha tumne…” saman ko jaise apne kaano pe vishwaas nahin hua..

“haan haan Saman wahi bola jaisa tumne suna….tum jaisa sachcha, achchha, pyaara mera bhai.. mere iss jeevan mein aur koi ho hi nahi sakta….”

“Gudiya bahut raat ho rahi hai, kal baat karte hain…Goodnight!” Saman ne phone kata aur chilla chilla kar ro pada….Titesh, Jagan, Waza sab utha gaye “bhai kya hua?….” “Gudiya ka phone aaya tha…” “don’t tell us usne friend zone kar diya” “nahi bhai!” Saman rote rote keh raha tha teeno uchal pade aur naachte naachte hue kehne lage “Yaar ke pyaar ki train patri pe daudne lagi..khushi ke aasun hain yaara ke” “Abey gadho!! Ladki friend zone nahi, bhai zone karke nikal gayi!…..” keh ke Saman aur zorse chilaaa kar rone laga. Sab shaant hogaye Titesh aur Jagan ne Saman ko dilasa diya “bhai yeh sab hota rehta hai….tera ek ek aansoon keemati hai..don’t waste it man….” Waza ek gift lekar aaya aur saman ke baju mein baith kar usse diya “Bhai yeh main tere liye laaya hoon…..” “Yeh kya hai?” “Khol ke dekh…” gift mein ek sundar si recycled paper ki diary thi… “yeh kya hai, kyu hai….” “Bhai! Dard ek marz hai aur marz ka ilaaz yeh hai….apni daastaan-e-mohabbat iss mein likhna….. Yeh diary sab sunegi, samjhegi, teri daawa banegi, bas kisi se tere dard ka zikar nahi karegi….” Saman ne usse dekha aur jorse gale laga liya….Chaaro ek dusre se lipatt kar roo pade…..

Agle din Saman college nahi aaya tha… Saman ki Dastaan-e-mohabbat maine suni toh apna sarr peet liya “

Main usse milne pahunchi toh Saman seriously majnu ki tarah building ke terrace pe pair latka ke baitha tha.. maine kaha  “ Arrzz kiya hai! Ladki toh haath se gayi dude ab kha le tu apna fav food…..Yeh le Sabar ka chicken, tujhe pasand hai na?..Chal party karte hain…..” Bas kya tha Saman ne mujh pe saari bhadaas nikaal di… khoob jam ke gaaliyan di… aur maine haste haste sunke kahaa.. Duffer tune jitney paise uspe barbaad kiye naa, utne paise mein tu ye tasty chicken kitne din kha leta… Spending money on Ishq is too much of risk… Na chahte hue bhi wo has pada aur Saman ki Dastaan-e-mohabbat ka wo aakhri din ban gaya….

– Urvashi