IHM Diary 6

Pichli baar hum kahan the ?

Vipasana ne apne Instagram story par peeche ki oar pade college ke kachare ke dher ki photo kheechi aur usse Instagram story bana di. Caption diya “Naare toh swachhta ke duniya bhar mein lagaate ho, par apne andar ke iss sach ko saaf nahi karte ho….Kya yahi hai Swachhta Abhiyan?” Bas phir kya tha Faculties ke taunt ki topein Vipasana ke liye chalne lagin….

Shaam ho gayi thi. Lectures khatam ho gaye… Dukhi Vipo hostel jaise hi pauhchi toh…college ke saare students Vipo ki Jai -Jaikaar karne lage …. We love you ma’m ke posters, placards le kar saare juniors chilla-chilla ke “Vipo Ma’m-Vipo Ma’m” cheer kar rahe the, wahin hostel ke corridor ke beecho beech ek table ke upar Vipo ka favourite chicken pizza uska wait kar tha aur phoolon ki maala se uska swagat hostel mein ho raha tha. Vipo hairaan hogayi

“Yeh sab kya hai? Kyun hai? Kya hua? Aaj toh mera birthday bhi nahi hai”
“Ma’m aapke liye ek surprise hain”…..
Vipo ko kheechte hue sabhi usse uski balcony pe leke gaye

“Ma’m yeh dekhiye aapki wajah se college ka wo kachra hatt gaya, jiska aapne post daala the aur Aaj hostel mein pesticides bhi spray kiya gaya ….Aur ma’m yahan dekhiye….” Vipo ko wey bhagaate hue corridor mein le gaye “ye dekhiye…water coolers bhi saaf kar diye … aur yeh wala toh naya hai!”
“Jo humare seniors nahi kar paaye Vipo woh tu ne kar diya….”

“teri wajah se, teri uss Instagram wali story ki wajah se ab humein keede makode pareshaan nahi karenge…”
“Humein in insects ki love bites nahin milengi, We love you Vipo”….
“Tu great hai yaar Vipo!”….

Vipo ne chain ki saans li… Aakhir itne taunt sunne ke baad.. aakhir kaar kuch toh achchha hua. Vipo ne mann hi mann mein socha – chalo ab koi keede nahi bache toh lecture bunk karke sone mein mazaa aayega, kal try karungi aur medical bhi de dungi. Yeh khyaal aate hi Vipo muskuraayi. Achaanak ab us ye shaam badi suhaani lagne lagi thi…..
Kuch Abhiyaan zindagi mein zaruri hote hain, bhale hi shuruaat mein takleef kyun naa ho, par uska parinaam itihaas rach deta hai…..
Aisa hi ek abhiyaan shuru kiya tha humare localites saathiyon ne…..

“This time… we are going to to celebrate Republic Day in a memorable manner. We are organising a blood donation camp in the college … I request all the students to report college’s porch area at 7am sharp ” Saare bachcho ko address karte hue Maya ma’m ki awaaz AV room mein gunj rahi thi….saare bachche ek dusre se phus phusaate hue keh rahe the “hum toh jaa rahe hain ghar, long weekend hai bhai….College ki taraf se khoon kaun donate karega. Aise bhi kaam karva-karva ke khoon chuste rehte hain ye log.. House-keeping class ke naam par jhaadu lagaao.. pochha lagaao…poora college saaf karwaate hain… Maid nahin rakh sakte ? Chaar paise gareeb aurat ko mil jaayenge.. Inhi logo ki wajah se desh mein un-employment badh raha hai” Shikaayato ke is silsile ko aage badhaane mein hostelites bahut aage the.

Agle hi din pura hostel khali ho gaya. Mushkil se 25 bachche bache the, Republic day tha, Aur phoolon ke baageeche ke beecho beech tha humare college ka porch area.Woh sondhi khushboo oss ki bundo se bheegi meeti ki, thandi hawa uchaalti khelti baageche se chali jaa rahi thi. Woh khili hui dhoop maano uss thand ke mausam mein lipti hui razai ka kaam kar rahi thi, blood donation camp lag gaya tha, Principle Sir aa gaye the, College ko puraani dulhan ki tarah sajayaga tha. Bas ek hi cheez ki kami khal rahi thi… Blood donors ki… aur woh the “Hum students!” Hostelites nahi the 25 bachcho ke alawa porch area mein koi khada nahi tha, Principle Sir gusse se Maya ma’m aur baaki faculties ko dekhte hue kuch kehne wale hi the jab badi tadaad mein localites ki entry hui “Vande Mataram! Jai hind!” ka naara lagate hue…

Daman ne muskura kar Maya ma’m ko dekha aur kaha….Ma’m humein apne college ke maan-sammaan ka dhyaan hai. Jab humein pata chala ki hostel ke bahut bachche ghar chale gaye hain, toh hum aagaye apna blood dene…..

“Thank you Daman! Bahut hi mushkil se inn blood donation walo ko aaj bulaya tha, agar koi nahi aata toh bahut problem ho jaati” Maya Ma’m Daman se impress ho gayi thi…

Principal sir ne jhanda vandan kiya aur hum sab bachche khoon dene ke liye camp ke bahar lambi line bana kar khade ho gaye… Mota-patla, senior-junior har bachche ne apna khoon diya…… maahaul zara emotional ho gaya tha. Sab yahi keh rahe the yaar khoon dene ke baad aisa lag raha hai ki aaj zindagi mein humne kuch achchha kiya hai….. Khushi ke is daure/attack mein kuch apni maa ya girlfriend ko phone karke bata rahe the aur kuch josh mein apne pita, bhaiyo, dosto ko phone kar ke rakt daan ka kissa suna rahe the…..Is khushi, josh, utsaah, umang se sabka chehre aaj kuch zyaada hi khila tha…Tab Kisi ne socha bhi nahin tha ki kuch hi kshann mein baraso se chale aarahe ek sach se unka saamana hoga… woh bhi college ki faculty ke zariye ….

Raktdaan ke baad localites mess ki oar badh rahe the… Yeh soch kar ki aaj subah se kuch khaya nahi hai, khoon diya hai toh kuch kha lete hai….Mess ke darwaaze tak jaise hi pauhche toh Kalit Sir ne andar jaane se rok diya….
“Bachcho kahaaan jaa rahe ho?”
“Sir kuch khaane bahut bhook lagi hai”
“Par aaj toh college band hai…”
“Sir humara college bandh kab hota hai? Chal toh raha hai. Sab toh aaye hain….Mess mein khana bhi lag gaya hai….Please jaane dijiye humein bahut bhookh lagi hai”
“Tum sab andar nahi jaa sakte…” Kalit Sir bade hi rukhe andaaz mein kahaa
“Kyun? Aaj toh juniors bhi nahi hain, jo unka wait karna padega ki kab woh khaake khatam kare aur hum khaayein”
“Tumhare liye khaana hi nahi hai….”
“Kyun sir?”

“Kyuni tum sabhi localites ho, Aur ye khana sirf aur sirf hostelites ke liye hai….Ab side hato yahan se hostel ke bachcho ko mess ke andar aane do….. Raste ke beech mein aise khade mat raho.. Abhi khoon de kar aaye hain woh….”
“Sir khoon toh humne bhi diya hai”
“ Haan par tum hostelite nahi ho… Hum khana nahin de sakte”…

“Sir, Neta ji ne toh kahaa tha – “tum humein khoon do, hum tumhein aazaadi denge,” aap khana bhi nahin de sakte hain”…
“Nahin… jaao yahaan se…” Kalit Sir kaafi rude ho gaye the..
Tab humein laga … Desh ke saath saath Netaji ka ye naara bhi badal gaya hai. Ab ye ho gaya hai – “Tum humein Khoon do, hum tumhein Khana nahin denge,”

Baat chubh gayi thi… Dil mein gehre utar gayi thi… Ek localite ne aage badh kar kaha “Sir, Aaj aapne bhi Localite aur Hostelite ka mudda utha diya….Aaj tak humne kuch nahi kaha , aap sab ne hamesha humein aise hi treat kiya hai, jaise humlog iss college ka hissa hi nahin hain….ye hamaara college hi nahin…. Par ab issi waqt se koi localite iss college ke mess ke andar kadam nahi rakhega. bas”. Yeh keh kar saare localites college se bahar nikal gaye…

“Localites aur Hostelites” ka yeh divide…college mein bada gambheer tha kisi religion, class, caste divide ki tarah… Jo college ke andar hostel mein rehte the woh hostelites the.. Is category ke students khudko bahut superior samajhte the, pure college ke jaise wo shehenshah the… aur sare college pe unka raj …..jo college ke bahar rehte the woh the Localites, jinhe puri duniye se koi rishta nata nahi tha. Woh bas apna karam karte the, college ki sari moh maya se door inki duniya 4 cheezon par teeki rehti thi – sutta, daru, gaanja aur neend…. Iske alawa jo apni life mein thodi thrill chahte the, woh pataa lete the IHM ki ladkiyan… Yeh Localites, woh bachche the jo Hostelites ki oar se college ke untouchables yaa adopted bachche ghoshit kiye jaate the… Humare college ke log kitna bhi try kar lein yeh woh line thi jo kabhi mitaayi nahi jaa sakti thi… this thing has been getting passed from one batch/year to another! Chahe tum raja ke bachche ho yaa college ke topper, koi farq nahi padta… localite bas localite hota hai…aur Iss bhedbhaav ko teen saalo tak jhelna uski niyati hai…That’s it.

Localites ne apni ladai pehli baar ladni shuru ki…. Saare localites ek group mein rehne lage, Hostelites se baatcheet band kardi, college ki ctivity mein help karna band kardiya, mess mein khana bhi band kar diya…..Yeh abhiyan 2 hafte chala. Mess ka khana 2 hafte tak har din badi bhari maatra mein phenka jaane laga. College ke kaam kaaj mein mushkilein aane lagi, kyunki kahin na kahin localites college ka sahara the. Har localite kisi na kissi cheez mein maahir tha aur college ki har waqt help karta tha… Aur jo mahir nahi tha woh bahar ka koi na koi kaam kar deta tha. Ab college mein haal ye tha ki hasi-thitholi lagbhag band hogayi. Aisa lag raha tha jaise college ki zameen achaanak banjar hogayi, aur saare hare bhare ped sookh gaye.. College students ke baavjood veeraan saa ho gaya tha. Kai faculties ne class mein cheezon ko normal karne ki koshish ki, par localites tas se mas nahi hue. Ek ne toh Nitish sir ke saamne keh bhi diya tha, “Sir hum ye kaam kaise kar sakte hain.. Hum toh localites hain, yeh hostelites ka kaam hai….. Nitish sir samajh gaye the, ki iss baar localites ke dil mein baat ghar kar gayi hai..lekin woh karte bhi toh kya? Iss baar students ke beech ki baat thi hi nahi, Yeh non co-operation movement to faculty ki wajah se shuru hua tha.

College sirf cement aur eent (bricks) ki ek imaarat nahi hota, woh ek insaan ke tarah hota hai, jo students ki hasi pe hasta hai, unke khel kudd aur mastiyo mein shareek hota hai, teachers aur students ke pyaare rishton pe naaz karta hai, unki muskuraahato se, shor sharaabon se zinda rehta hai. Jab yeh sab college mein nahi hota hai, toh woh college udaas ho jaata hai sirf ek suni imaraat bana kar reh jaatahai…. Is baar IHM Ahmedbad ka bhi yahi haal tha…Kalit sir humaare josheele, jawaa(n) college ko veeraan bante dekh rahe the… aur kahin naa kahin unhe us din ki baaton ka pachhtava hone laga tha… Insaan ek pal ke liye taish mein aakar kuch keh toh deta hai, kar deta hai, par jab uska anjaam aankhon ke saamne aane lagta hai… toh realisation… galatiyo ka ehsaas to hota hai…

Agle din Kalit sir ne lunch hour mein students ki mess ke bahar meeting bulayi… Mess ka darwaaza band tha. gusse mein bhare localites ek doosre se keh rahe the “lo Ab humare mess dekhne se bhi inn ko problem ho gayi hai…yeh kabhi nahi sudhar sakte!” Kalit sir ne mess ki kitchen se kursi mangavai aur uske upar khade hogaye…. Haath jodkar kehne lage, “Main jaanta hoon, Maine galat kiya hai, Bachcho tumhara gussa Ab main nahi seh sakta. iss college ko tum sab se pyaar hai, mujhe tum bachcho se pyaar hai… Main hath jodkar tum sab se maafi maangta hoon… Yeh college sabka hai, Yeh classrooms sabke hain. Yeh mess aur iss mess ka har khana sab bachcho ka hai… Main promise karta hoon, Aaj se main kabhi bhi localites aur hostelites mein bhed bhav nahi karunga…..

Bheed mein se ek bachche ne chilla kar kaha “ Sir toh phir aapki plate ki puri bhi humari hai…” Saare bachche iss baat par thahaake maar kar has pade…. Kalit Sir num aankhon se muskuraye aur haste hue bole, “Haan beta! Par agar meri puri khaake tere pet mein dard hua, toh uski zimmedaari meri nahi …..”

2 hafte ke baad college phir se khil-khila pada … Mess ka darwaaz khula toh “Welcome back students” ka banner saare localites ka swagat kar raha tha…

by Urvashi